&& انا جيت ازوركم افتحو لى الباب && بقلم / بسملة محمد‏

‏‏

انا جيت ازوركم افتحو لى الباب
وبلاش تخافو من العطش والجوع
بعد الفطار يتجمعو الاحباب
واللى اتمنع من قَبله من ممنوع
الورد يعرف قيمة الصبار
وزهرة بالصبر الجميل بتعيش
واللى ماكنتوش بتزوروه ينزار
ويجيلكو ضيف من مدة ما بيجيش
شفايفكم الناشفة بحنان تتبل
لما تنادوا حبيب قريب او صديق
لو فى اللسان علقم وصبر وخل
الحب ح يطيب مرار الريق
ارووا العطش والجوع بذكر الله
سبحانه له حكمة فى شهر الصوم
واللى يلاقى فى العبادة دواه
احسن من اللى يداوى جوعه بنوم
انا جيت ازوركم افتحو لى الحضن
انا شهر بدر وشهر يوم عَشَرة
انا حضن موصوف للضياع والحزن
بالسعى طاقة قدرى والنصرة